Претставници на НУ-УБ „Гоце Делчев“ на 27 и 28 октомври присуствуваа на саемот на книга во белград. Средба со заменик-директорката и со лицата одговорни за меѓународна соработка и дигитализација при Народната библиотека на Србија, посета на Градската библиотека во Белград, средба со заменик-директорот на Универзитетската библиотека во Белград, интервју за Српската научна телевизија, се само дел од активностите што ги имаше делегацијата од Штипската библиотека во посета на Р. Србија.

Со предлози за понатамошна меѓународна соработка, беа продлабочени официјалните односи, при кое беше и конкретно договорено и учество на претставници од НУ-УБ „Гоце Делчев“ - Штип на Меѓународна конференција во 2017 година во Белград и вклучување на библиотекарски трудови во Меѓународното е-списание „Медиевал“ што за прв пат оваа година го издава Штипската библиотека.

Претставниците од Штип присуствуваа и на предавање за развој на дигитализацијата во библиотекарството, одржано во рамки на 61. Меѓународен саем на книга во Белград а директорката на библиотеката Милена Ристова-Михајловска имаше интервју во живо во емисија на Српска научна телевизија.



„Весела среда“ се повеќе се покажува како успешна содржина на НУУБ „Гоце Делчев“.На пример, денес наша цел повторно беше ширење на љубов кон книгата, преку заедничко дружење и ликовно изразување.

Нашите ученици од ПОУ "Ванчо Прке" од Ново Село изработија цртежи со книги и прочитаа по неколку редови од нашите убави книги. Секоја среда, со нова содржина се обидуваме да го прошириме убавиот збор за книгата и да ги научиме децата, уште од најмала возраст да разберат дека книгата може да биде добар и траен сопатник од кој може да се научи речиси се за животот.

Македонското културно друштво „Македонија“ од Сплит и Здружението КУРС од Сплит спроведуваат заедничка културно-уметничка соработка во периодот од 28 октомври до 1 ноември 2016. Тие ќе го претстават програмот „СМОШ-Фестивал на книжевност и музика“ во три града во Македонија, Охрид, Штип и Скопје.
Проектот има за цел културно поврзување на Македонија и Хрватска и продлабочување на нивните пријателски врски.

На 30 октомври 2016 предвидено е претставување во Штип во НУ-УБ „Гоце Делчев“ во Штип со почеток во 18:00 часот. На манифестацијата ќе се претстават „Клинци-Мандолинци“, Книжевност во живо со сплитските писателки Тонка Алуевиќ и Слободанка Џуџерија.
Клинци-Мандолинци ги сочинуваат Никола Митревски, Мате Кошутник (мандолина), Јероним Башиќ (мандола), Бригита Бановиќ (мандолончело) и Иван Новаковиќ (гитара) кои исполнуваат Македонски и Хрватски традиционални народни песни и кои дејствуваат веќе три години како дел од МКД „Македонија“ од Сплит под водство на професорот Ивана Кенк Калебиќ.

Во НУУБ „Гоце Делчев“ се оддржа предавањето и претставувањето на едицијата „Врвови на светската историја, филозофија и психологија со психоанализа“ како дел од одбележувањето на 23 октомври – Денот на македонската револуционерна борба. Гледајќи кон иднината, младите забораваат на минатото, констатирале историчарите:
- Историјата е учителка на животот, но за жал од неа се поналку се учи и се вадат поуки - рече Тодор Чепреганов, универзитетски професор.

Освен обичниот народ и голем број научници од областа на историските науки, досега се соочувале со проблем на соодветен материјал, нешто што е надминато со едицијата „Врвови на светската историја, филозофија и психологија со психоанализа“:
- Материјалите беа концентрирани на еден период и вакум за друг, па мораше да се прибирата информации и од соседството, истакна Соња Николова, промотор.

Вакви проблеми сега ќе немаат студентите по историја кои сите потребни материјали ќе можат да ги најдат на едно место:
- Едицијата е достапна во нашата студентска читална и на располагање на сите заинтересирани, рече Милена Ристова - Михајловска, директор на НУ – УБ „Г. Делчев“ – Штип.
Токму оваа едиција беша промовирана во Штип.Ваквите промоции се одлична можност да научиме нешто ново, рекоа посетители.

Д.Р.
19/10/2016
Продолжува есенскиот саем „Листови“ на НУУБ „Гоце Делчев“ во Штип. Голем број на ученици ги посетија штандовите на издавачите а секако книгите беа во центарот на интересот и на повозрасни штипјани. Цените привлечни, насловите различни, од стручна литература до белетристика. За секого по нешто.
Библиотеката ја искористи можноста на својот штанд да ги претстави насловите од 135 тома македонска книжевност кои се продаваат по цена од 157 денари ! Утре е третиот и последен ден од саемот. Повелете !



